រដ្ឋមន្ត្រីការបរទេសចិន លោក វ៉ាង យី នឹងអញ្ជើញជាអធិបតីក្នុងពិធីប្រគល់ និងទទួលពហុកីឡដ្ឋានជាតិមរតកតេជោនាថ្ងៃស្អែក។
ក្រសួងការបរទេសបានឱ្យដឹងថា នាថ្ងៃស្អែកទី ១២ ខែកញ្ញា ឆ្នាំ២០២១ រដ្ឋមន្ត្រីការបរទេសចិនលោក វ៉ាង យី និងនាយករដ្ឋមន្ត្រីកម្ពុជា សម្ដេចតេជោ ហ៊ុន សែន នឹងចូលរួមដោយផ្ទាល់ក្នុងពិធីប្រគល់ និងទទួលជាផ្លូវការពហុកីឡដ្ឋានមរតកតេជោ ដែលនឹងក្លាយជាទីតាំងសំខាន់សម្រាប់ការប្រកួតកីឡាអាស៊ីអាគ្នេយ៍ឆ្នាំ២០២៣ខាងមុខដែលកម្ពុជាធ្វើជាម្ចាស់ផ្ទះ។
ក្រសួងក៏បានឱ្យដឹងផងដែរថាក្រៅពីអញ្ចើញក្នុងពិធីប្រគល់ និងទទួលពហុកីឡាដ្ឋានថ្មីនេះ លោក វ៉ាង យី និងសម្ដេចតេជោ ហ៊ុន សែន ក៏នឹងអញ្ជើញជាសាក្សី និងអធិបតីក្នុងពិធីចុះហត្ថលេខាលើឯកសារទ្វេភាគីដ៏សំខាន់មួយចំនួនផងដែរ។
ក្រសួងបានសរសេរថា៖ « ដំណើរទស្សនកិច្ចផ្លូវការរបស់ឯកឧត្តម វ៉ាង យី មកកាន់កម្ពុជាលើកនេះ នឹងបន្តពង្រឹងបន្ថែមទៀតនូវមិត្តភាពជាប្រពៃណី និងកិច្ចសហប្រតិបត្តិការនៃភាពជាដែគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ ក្នុងបរិបទនៃបញ្ហាប្រឈមជាសកលដែលកំពុងកើតមាន » ។
ពហុកីឡដ្ឋានមរកតតេជោ មានតម្លៃជិត១៦០លានដុល្លារ ដែលអាចចាត់ជាពហុកីឡដ្ឋានល្អដាច់គេមួយនៅអាស៊ាន សាងសង់នៅលើផ្ទៃដីជាង១៦ហិតា និងអាចផ្ទុកអ្នកទស្សនាបានប្រមាណ៦ម៉ឺននាក់៕